الثلاثاء، 22 نوفمبر 2016

الأم المصرية

جواهر .. أم صلاح في فيلم الناظر .. مثال وقدوة لكل أم مصرية


هي الأم الوحيدة في العالم متعددة المواهب ومفيش حاجة تقول ماعرفهاش ..
خبرة الأمهات متوارثة من أيام الفراعنة .. كل أم بتدي لبنتها خبرتها والموضوع ماشي كده من قرون لحد ما الأم المصرية دلوقتي عندها خبرة إنها تفتح مفاعل نووي في مطبخها وتفتح صيدلية في درج التسريحة !!
هي الأم اللي بتفهم في الطب .. تقدر تكشف على ابنها وتشخص وتجيبله علاج من الصيدلية من غير ما تروح للدكتور .. مش مهم تكون بتعمل حاجة غلط لكن الأهم من ده إن عندها ثقة في خبرتها ..
الأم المصرية عندها موهبة متوارثة لاستخدام السلاح والنشان .. بتعرف ترمي الشبشب في المكان الصح من مسافات بعيدة .. ولازم الرمية تصيب ونادرا لو خابت ..
الأم المصرية عندها مواهب ضابط المخابرات .. تقدر تسألك أسئلة وتعرف أنت كداب ولا لأ من نظرات عينيك وطريقة كلامك .. تقدر تحقق معاك بالأيام وتوقعك بكل سهولة لو بتحور عليها..
الأم المصرية هي اللي طول عمرها هتفضل تقولك أنت خاسس ليه كده ووشك هفتان حتى لو وزنك معدي ال 200 كيلو ..! كل ما تشوفك قدامها هتحدفك بموزة ولا تفاحة وتقولك كل يابني انت وشك بقى زي اللمونة من قلة الأكل ..
الأم المصرية هي اللي لما تشوف البنت اللي بتحبها هتقولك هي مالها مسخوطة كده وشبه البورص .. وتكون مستغربة من إختيارك أوي وتقولك متأكد إنها عاجباك ؟! .. وفي نفس الوقت لو جابتلك عروسة بنفسها ونقاوتها بتكتشف انها جايبالك واحدة شبه جدتك أو خالتك وتقولك دي جميلة وبيضا وزي القمر ..!
الأم المصرية هي اللي هتبقى حماتك وهي اللي هتبقى حماة مراتك.. يا تعيشوا مبسوطين لو كانت طيبة .. يا تزهقكم لو كانت بتحبكم أوي ..
* * *
كل ده وفي نفس الوقت .. هتلاقي الأم المصرية هي اللي هتفضل شايفاك عيل صغير وتخاف عليك وانت خارج وتقلق عليك لما تتأخر ..
الأم المصرية هي اللي هتقولك لا أنت ابني ولا أعرفك لو عملت حاجة تزعلها أو مش موافقة عليها .. وبعدها تسامحك لما تعتذرلها..
الأم المصرية هي الأم الوحيدة في العالم اللي هتعملك أحلى محشي وحمام وصينية باشاميل..
هي اللي هتفهمك من غير ما تتكلم ولا كلمة وتحس بيك حتى لو مش شايفاك ..
الأم المصرية هي فعلا أحلى أم في الدنيا..