الثلاثاء، 22 مارس، 2011

جامعة فاروس: مرفه وتافه ؟

| لو اعجبك اعمل لايك , وممكن تكسب معانا |
إعذروني مقالي إنهاردة مش هيكون بالعربي .. ولا بالفصحى .. أنا هتكلم مصري 
العنوان مجرد لـ لفت نظر كل واحد بيقول كدا بدون ما يكون عارف ومجرد "بيهيص" في "الزيطة"

أولا كلمة مرفه اللي بتتقال دي وفاشل متتقالش على طلبة فاروس :
أنا اعرف كتير جايبين فوق الـ 90 % وفرق معاهم درجات بسيطة على الكلية اللي اتمنوها واضطروا يدخلوا الجامعة عشان مستقبلهم
الناس دي لا أهاليهم "حـــرامية" ولا بيجيبوا الفلوس من الأرض الناس دي بتجيب فلوسها وبتتعب عشان كدا 
وفكرة الترفيه فكرة خاطئة تماما يمكن الطلبة بيدفعوا بالآلاف لكن للأسف مبياخدوش حاجة بيها 
يعني هتدخل الجامعة بفلوس وهتدفع جواها كمان فلوس 
وفيه ناس داخل الجامعة أفضل بكتير من أي حد خارجها 

والناس اللي بتقول عليهم همج عشان مشافوش غير فيديو تكسير البوابة وفاكرين إن ده حصل من أول يوم
أحب أقول إن الطلبة بدأوا بالإجتماعات المطولة والكتيرة جدا حوالي 17 إجتماع بين الطلبة والادارة واللي قالوا هينفذوه مطالب "هايفة" زي الأصانصير اللي هوا أصلا من حق الطلبة والجامع يبقى مفتوح طول الوقت مش يتقفل .. والمكتبة تفضل فاتحة طول الوقت
 إنما أي حاجة تانية بتترفض 

بعد ما فقدوا الأمل بدأت المظاهرات السلمية .. خوفوهم وأخذوا كل من ظهر على رأس التظاهرات وحذروهم بالفصل
بدأت الاعتصامات واتمنع الأكل والخروج واتقفلت الحمامات وكل حاجة أول يوم 
بعد كدا اترفع عليهم الحزام وبدأ العنف في شكل بسيط
لحد ما وصل الأمر إنهم قفلوا البوابات ومنعوا أي طالب بالدخول إلا بعد دفع المصاريف كلها كاملة بدون اعتبار لكلام الجيش اللي طلب انهم ميدفعوش غير لما يناقشوه معاهم وحصل أول اشتباك تهجم الامن على الطلبة بالشوم واحنا عزل تماما 

تاني يوم بعد ما الجيش وعدهم بالدخول والحضور لقوا الأبواب مقفولة بردو وبعد فقدان الأمل توجه الطلبة لدفع الأبواب عشان يحضروا بناءا على طلب الجيش 

وبدأوا بحماية افراد الأمن اللي تعدوا بالضرب على الطلبة اليوم السابق له خوفا عليهم ولكن فوجئوا أن الأمن بيسبهم ويشتمهم هما كمان
فزاد الأمر وأخذت قطع الحديد والشوم وبدأوا بضرب كل الطلاب لحد ما اتفتحت راس زميلهم " أنس " وبعد كدا الأمر وصل للرمي بالطوب والحجارة 

لما تكتشف إن الجامعة كانت قايلة في وسائل الاعلام عن حاجات دخلوا ملقوهاش في الكلية ده يبقى ايه ؟
لما تكتشف إن المصاريف بدلا من 39 ألف هتبقى 50 ألف ده يبقى ايه ؟ وسعر الساعة بيختلف من ترم لآخر 
لما تكتشف إن الجامعة غير معتمدة خارج مصر

لو أخوك هوا اللي اتضرب هتسكت ؟ لو أختك اترعبت خوفا على أخوها اللي بيتضرب هتسكت ؟

مظــــــــــــــــــنش

أرجو إنكم تنشروا الكلام ده وتوصلوه لكل واحد مش فاهم ايه اللي حصل 

Share/Save/Bookmark

‏هناك 8 تعليقات:

  1. 4 صيدلة فاروس22 مارس، 2011 12:02 م

    معاك حق الف فى المية

    ردحذف
  2. احنا عاوزين التلقزيون يجي ويشووفو الي بيحصلنا ويعملو لقاءات مع الطلاااااااااااب عشان احنا تعبنا من الظلم الي بيحصلنا

    ردحذف
  3. فيه اجتماع مع الطلبة في نقابة المحاميين وفيه تصوير تلفزيوني احضروه بقا

    ردحذف
  4. well said thank you

    ردحذف
  5. لا حول ولا قوة إلا بالله
    دا يا جماعة يعتبر غش تجاري
    يعني يقولك هنا ان الجامعة بتدي شهادة مزدوجة وفي الاخر يطلع الكلام دا كله كدب والجامعة مش معترف الا في مصر وبعدين يقلك "اصل في بعض المعوقات اللي خليتنا منعرفش نعمل شهادة مزدوجة طب ليه مقلتوش كدا من الاول
    وحكاية المصاريف يقولولك انتو داخلين وعارفين المصاريف من الاول يبقى لازم تلتزمو بالعقد", " طب هو يعني العقد ملزم لينا بتنفيذه ومش ملزم لرجب أفندي الحكاية دي مش هتعدي على خير ومحدش مننا هيسيب حقه ودا أمر طبيعي

    ردحذف
  6. 7asbna allaaaaaaaah w ne3m el wakeel f mohamed ragab da :(

    ردحذف
  7. بعد التحيه والسلام والله كل اللي قلته كلام جميل وصح ميه فالميهوازيدك ان اللي بيحصل ده بلطجه اكيد وخصوصاًأن ده لعب بمستقبل اولادنا في الجامعه فأنا ولية امرطالبه في جامعة فاروس كلية أسنان وأحنا فعلاًأعتمدنا على ما نشر عن الجامعه وما أخبرنا عنه في الجامعه عند التعقد ولكن بما تم نشره فنحن مضحوك علينا ميه في الميه فعند تخرج أبنائنا من الجامعه سوف يكون معهم مجرد ورقة غير معترف بيها من نقابة أطباء الاسنان وده في حد ذاته نصيبه وطبعاً الشهاده من الجامعه في كاليفورنيا برده ضحك على الدقون والنصيبه أن كل ده يحصل تحت سمع وبصر أولياء الأمر إي المجلس العلى للجامعات والسيد المحترم رئيش الجمهوريه ووزارته طبعا ياعني احنا اتنصب علينا من الدوله كلها طيب نشكي لمين ومين يجيب لنا واولادنا حقوقهم مع هذه العمليه من النصب أزاي الاولاد ارقبوا يتخرجوا وهمه مغيبين عن كل هذه الحقائق ولولا الثوره اللي حصلت الله أعلم باللي كان حيحصل والله أعلم لغاية دلوقتي ايه اللي حيحصل مستقبل اولادنا حيصل فيه ايه وخصوصاً أن اولادنا طلبه متفوقين تقديرهم كل سنه امتياز رغم الكوسه اللي موجوده في الكليه واللي كانوا بيشتكوا منه ياعني لهمه مرفهين ولامدلعين ورغم اننا متغربين وبعاد عنهم ياعني احنا بندفع الفتوره مرتين مره في غربتنا ومره في ضياع مستقبل اولادنا ياجماعة ياناس الناس اللي مسافرة مش بتغرف من البير زي ما انتوا فاكرين فلوسنا بنجيبها بتعب ومرار والله اعلم بينا ياعني لاحنا اصحاي مشاريع ولامصانع حديد احنا كل اللي عملناه شقة سكنيه نعيش فيها وياريت عارفين ننزل علشان ندفع فلوس الكليه وياريت عاجب الحكومه كمان بينصبوا علينا ؤبيضيعوا مستقبل اولادنا حسبي الله ونعم الوكيل كفايه الرعب اللي حسيت بيه بنتي وهي شايفه زميلها واقع ودماغه مفتوحه ليه علشان حاسس انه اتظلم وأن مستقبله ضاع هو في جامعه ولا فين مين يقول ان الطلبه في حرم الجامعه يقوم الامن بالتعدي عليه بالضرب بهذه الطريقه انا أملي الأن في الوزارة الجديدة والسيد الدكتور شرف والمجلس الاعلى للجامعات والمجلس الاعلى للقوات المسلحة فهل سيستجيبون لنا وهل سيحافظون على مستقبل ابنائنا اتمنى ذلك وإذا تعذر هذا ارجوا اعلامنا بذلك حتى نستطيع ان نتصرف في امكانية نقل ابنائنا من هذه الجامهة التي قامت بالنصب علينا ونلحق المتبقي من مستقبل اولادنا وهل سوف تقبل جامعة اخرى هؤلاء الطلبه ولكني كلي أمل ان تحل هذه المشكله ويستمر ابنائنا في جامعه فاروس ويأخذوا جميع حقوقهم ولكم مني جزيل الشكر مرسلته فاتن كريم

    ردحذف
  8. كلامى مهم
    انا والله موظف بجامعة فاروس اسوء ادارة وبجد الادارة بتعين مستشارين لجلب أكبر مال من الطلبة هما الهدف الاساسى للربح واقسم ان اخر ما يتمنوة هو التعليم هدفهم فى صافى الربح
    سوء من الادارة همجية فى التعليم سمحونى
    انا كمان الموظفين بنعانى من سوء المعاملة والله العظيم ما لقين حد يسمعنااتمنى توحيد القوانين فى جميع الجامعات الخاصة وان يعين احد من الوزارة لا ينتمى الى رجب ولا يعرف معنى الرشوة
    اخر كلامى انه بوجود رئيس الجامعة لا معنى ليه جميع القرارات يتمشى بها علاء رجب الهمجى مع الاسف

    ردحذف

Twitter Delicious Facebook Digg Stumbleupon More

 
Powered by Blogger